Welcome to shalandi webzine

କଥା କଥା କବିତା କବିତା- ଏକ ଅତୁଳନୀୟ ପତ୍ରିକା

ଶାଳନ୍ଦୀ ସମୀକ୍ଷକ

କଥା କଥା କବିତା କବିତାର ପାର୍ବଣ ୨୦୨୧ ସଂଖ୍ୟା ଏବେ ପାଠକାର୍ପିତ ହୋଇଛି । ଏହା ନିଃସଂଦେହରେ ବେଶ ଆକର୍ଷଣୀୟ ଓ ସୁସଂପାଦିତ । ପାଠକ ମହଲରେ ଏହା ନିଜର ସ୍ବାତନ୍ତ୍ର୍ଯ ବଜାୟ ରଖି ପାରିଛି । ସମସ୍ତଂକ ପାଇଁ ଏହା ସଂଗ୍ରହଣୀୟ । ଏହାର ବିଶେଷତ୍ବ ହେଉଛି ଆମ ଭାଷାର ଲେଖକମାନଂକ ଲେଖା ସହିତ ଅନ୍ୟ  ପ୍ରାନ୍ତୀୟ ଭାଷା ତଥା ବିଶ୍ବ ସାହିତ୍ଯର ଝଲକ ଏଥିରେ ସନ୍ନିବିଷ୍ଟ । ଏ ସଂଖ୍ୟାର  ସଂପାଦକୀୟରେ କରୋନା ମହାମାରୀ ପରିପ୍ରେକ୍ଷୀରେ ଜନଜୀବନ କିପରି ପ୍ରଭାବିତ ଏବଂ ଆମ ସାହିତ୍ୟର ପାଠକ ସଂଖ୍ୟା ହ୍ରାସ ପାଉଛି ତାର ଏକ ଅନୁଶୀଳନ ରହିଛି । ସଂପାଦକଂକ ଦ୍ବାରା ପ୍ରସ୍ତୁତ ଆଲେଖ୍ଯ  ‘ ଧୂସର ଉପତ୍ୟକାରେ ସୃଜନ କ୍ଷେତ ‘ ଏକ ଅତ୍ୟନ୍ତ ଉପାଦେୟ ଆଲୋଚନା।
୪୩୦ ପୃଷ୍ଠାରୁ ଉର୍ଦ୍ଧ ଏହି ବିଶାଳ ପତ୍ରିକାଟି ଏକ ଅବଶ୍ୟ ସଂଗ୍ରହଣୀୟ ସାହିତ୍ୟ ଦସ୍ତାବିଜ । ଓଡିଆ ଭାଷାରେ ପ୍ରକାଶିତ ଅନ୍ୟାନ୍ୟ ପତ୍ରିକାଠାରୁ ଏହାର ଭିନ୍ନତା ବେଶ ସହଜରେ ବାରି  ହୋଇ ପଡିବ । ଏହାର ତୁଳନା କେବଳ କେନ୍ଦ୍ର ସାହିତ୍ୟ ଏକାଡ଼େମୀ ପ୍ରକାଶିତ ଇଣ୍ଡିଆନ ଲିଟେରେଚାର କିମ୍ବା ସମକାଳୀନ ସହିତ କରାଯାଇପାରେ । ବେସରକାରୀ ସ୍ତରରେ ଜଣେ ସମ୍ପାଦକଙ୍କ ଏକନିଷ୍ଠ ଶ୍ରମ ଓ ଉଦ୍ୟମ ବଳରେ ଏହିଭଳି ଏକ ମନୋଜ୍ଞ  ପତ୍ରିକା ଯେ ସମ୍ଭବ ହୋଇପାରିଛି ତାହା ଆମ ସମୟର ଏକ ଉତ୍ସାହଜନକ ପ୍ରସଙ୍ଗ  । ଏଥରର ସୂଚୀପତ୍ର ପୂର୍ବ ସଂଖ୍ଯା ମାନଙ୍କ ପରି ନିଜର ମାନ ବଜାୟ ରଖିପାରିଛି । କବିତା ବିଭାଗରେ ଅଛି ପ୍ରବୀଣ ଓ ନବୀନ ମାନଙ୍କର ଯୁଗଳବନ୍ଦୀ । ଶହେରୁ ଉର୍ଦ୍ଧ କବିତା. ଅନୁବାଦ କବିତା ଓ ଗୀତିକବିତା ସ୍ଥାନିତ ହୋଇ ପାଠକମାନଙ୍କର କବିତା ତୃଷ୍ଣା ମେଣ୍ଟାଇ ପାରିଛି । ଆମ ସମୟର କଥାରେ ଅଛି ଓଡିଆ ଭାଷାର  ଚାରୋଟି ଗଳ୍ପ । ତତ ସହିତ ଅନୁବାଦିତ ଗଳ୍ପ ବିଭାଗରେ ଅଛି ଚାରୋଟି ଭାରତୀୟ ଭାଷାର ଗଳ୍ପ । ବ୍ୟାସକବି ଓ ମିମିର ସାହିତ୍ୟ ଶିକ୍ଷା ଏକ ଉଚ୍ଚକୋଟିର ରମ୍ୟ ରଚନା । ସୃଜନ ଆକଳନ ବିଭାଗରେ ସମସାମୟିକ ସାହିତ୍ୟ କୃତୀ (ଗଳ୍ପ ସଂକଳନ ଓ କବିତା ସଂକଳନ) ଉପରେ ଆଲୋଚନା କରିଛନ୍ତି ସମକାଳର ବିଶିଷ୍ଟ ସାହିତ୍ୟ ସମାଲୋଚକଗଣ । ସେହିପରି ସୃଜନାୟନ ସ୍ତମ୍ଭରେ ଦୁଇଜଣ ସମସାମୟିକ କବି ଓ କଥାକାରଙ୍କ ସମଗ୍ର ସୃଷ୍ଟି ଉପରେ ଆଲୋକପାତ କରାଯାଇଛି । ଅନ୍ୟାନ୍ୟ ଗୁରୁତ୍ବପୁର୍ଣ ଆଲେଖ୍ୟ ମଧ୍ୟରେ ରହିଛି ସ୍ମରଣୀୟ ପ୍ରେମପତ୍ର, ହେମିଂୱେଙ୍କ ପ୍ରସିଦ୍ଧ ରଚନାବଳୀର ପ୍ରଭାବ, ୨୦୨୧ ର ନୋବେଲ ପୁରସ୍କାର ବିଜେତା ଅବଦୁଲ ରଜକ ଗୁର୍ନାହ, କବିସୂର୍ଯ  ବଳଦେବ ରଥଙ୍କ ରଚନା, ପ୍ରେମଚନ୍ଦଙ୍କ ସାହିତ୍ୟ ସମ୍ଭାର ପ୍ରଭୃତି ଆଲୋଚନା । ପ୍ରମୁଖ  ଆକର୍ଷଣ ହେଉଛି ନିକଟରେ ପରଲୋକ ଗମନ କରିଥିବା ହିନ୍ଦୀ କଥାସାହିତ୍ୟର ବିଶିଷ୍ଟ ଲେଖିକା ମନ୍ନୁ ଭଣ୍ଡାରୀଙ୍କ ସାକ୍ଷାତକାର ଓ ପ୍ରସିଦ୍ଧ ଓଡିଆ ଲେଖକ ମନୋଜ ଦାସଙ୍କ ଉପରେ ଏକ ସାମଗ୍ରିକ ଆଲୋଚନା। କଥା କଥା କବିତା କବିତାର ଏ ସଂଖ୍ୟାରେ ଏତେ ସାହିତ୍ୟ ଆଲେଖ୍ୟ ଭରି ରହିଛି ଯେ ଆପଣ ପଢୁଥିବେ , ତଥାପି ସରୁ ନଥିବ , ଥରେ ପଢିବାକୁ ଆରମ୍ଭ କଲେ ଶେଷ ନ  କରି ରହିପାରିବେ ନାହିଁ ।
ଏପରି ଏକ ସୁଦୃଶ୍ୟ  ଏବଂ ସୁଖପାଠ୍ଯ  ସଂଖ୍ୟା  ଭେଟି ଦେଇଥିବାରୁ ସଂପାଦକ ଶ୍ରୀ ଅକ୍ଷୟ ବେହେରା ଧନ୍ୟବାଦର ପାତ୍ର । ସମ୍ପାଦକ ଗଢୁଛନ୍ତି ଓଡିଆ ଭାଷାର କୋଣାର୍କ । ଏକା  ଏକା । ନୀରବରେ । ନିରବଚ୍ଛିନ୍ନ ଭାବରେ । ତାଙ୍କର ଉଦ୍ୟମକୁ ଯେତେ ପ୍ରଂଶସା କଲେ ବି ତାହା କମ ହେବ ।

 
 

 

ଶାଳନ୍ଦୀ ସାହିତ୍ଯ

COMMENTS - 0

Leave a comment

Name

Email or Phone No (the information will be not disclosed)

Comment